വിരാമം (കവിത)

വിരാമം..

ഒരവസാനം കുറിച്ചുകൊണ്ട്
നീ വരുമ്പോൾ....
നടന്നുനീങ്ങുന്ന
പാദങ്ങളാരുടെ
മിഴികളീറനണിയിക്കുന്നു....?
കൊഴിഞ്ഞു വീണ
ഇലകളൊരു കാലയളവിന്റെ
സ്മൃതികളുണർത്തുന്നു.....
കാൽച്ചുവട്ടിൽ
വെന്തമണ്ണൊന്നു
കുളിരണിയാനും,
അങ്ങകലെ
മൂടിക്കെട്ടിയ വാനവീഥിയിൽ
മേഘതുണ്ടുകളൊന്നു
പെയ്തൊഴിയാനും
കാത്തിരിക്കുന്നു....

തിന്മകളിൽ നീവാഴുമ്പോൾ
നന്മകളിൽ നീ മരിക്കുന്നു....
ഒരു ശ്വാസത്തിൻ
അന്ത്യത്തിലും
നിനക്കു പിറക്കാം!
ചലനമറ്റൊരു ദേഹത്തിലുറങ്ങാം....

ബന്ധങ്ങളിലെ
ബന്ധനങ്ങളഴിച്ചു
നിനക്കു ചിരിക്കാം....
പ്രണയത്തിൻ വാതിൽ കൊട്ടിയടച്ചതിലൊരു
വില്ലന്റെ കത്തിയോങ്ങാ,മൊരു
പ്രതികാരദാഹിതൻ
രക്തമണിയാ,മൊരു
പ്രണയനൈരാശ്യത്തിൻ
ആത്മഹത്യയിലൊടുങ്ങാം.....

ഒരു താലിതൻ ചിത്രം
മായ്ക്കാം....
ഒരു ജന്മത്തിന്റെ സ്നഹപ്രവാഹത്തിലൊരു
തടയണയിടാം....
ഒരു പുതുപുലരിയ്ക്കായെല്ലാം ത്യജിക്കാം.....
ഒരു നല്ല മനുഷ്യന്റെ
പ്രതിജ്ഞയിലേറാം !